Assalamualaikum..
Bapantun-pantun tah jua ku di pisbuk musim-musim puasa saiyatu. Ada jua bisia tuut nyahuti, ku tauh taya dalam blog supaya aie lain dapat jua ku lihat. Hantap pandai bisia bapantun jamu..
Bisia yang ada tuut bapantun: Kedayan Melanggai, Bilalang Imba, Raja Gauk Beulah, Ali Hassan Pirambib, Fazidah Ahmad, Johnny Hj Mungkil, Mohd Saiful Rizal Amlih, Si Noo, Ashleyn Bumiputraputri Rockers, Janie Kasdi & Dandan Madi.
Kadayan Banaa:
Mun bajalan di hutan,
Jaan tah mbawa amas suasa..
Mun anak bulan kalihatan,
Tantu tah isuk kita puasa..
Kedayan Malaganggai:
Esuk haie selasa
Haie selasa malam rabu
Alum tantu puasa
Sbb nyuluh bulan lupa bwa lampu
Raja Gauk Beulah:
Ada kambing di ternak
gauknya menjaga haliwat
si bulan alum tah buat anak
pa gayanya kan melihat
Raja Gauk Beulah:
Kanak2 main papan
ada jua yg main buwayan
bah mun sudah kelihatan
pa lagi maetah ngunjar pesungkaiyan.
Ali Hassan Pirambib:
Raya tiba bulan hadapan..
Buat persiapan siang malam..
Sibuk malihat anak bulan..
Pakah2 puasa sabulan tingalam..
Kadayan Banaa:
Puhun gatah andangnya dituih,
Puhun duyan inda kuasa...
Malam ani suung tah tarawih,
Isuk mulaan taya puasa...
Fazidah Ahmad:
Gail udang nda beluwih,
sambil ngail mkn caamai,
bah mlm ani mula thah kita terawih,
terawih kita be amai2..
Johnny Hj Mungkil:
Takaciit, takamih luan nahanakan,
Kalua tahik nda baapak kaas,
isuk siang x laagik ulah makan,
Bakas isyak tarawih, jaan malas....
Mohd Saiful Rizal Amlih:
Makan nasi nda baasa,
nyaman lagi masakan mama,
isuk mula bangun puasa,
mudahan semuha amalan di taima...
Kadayan Banaa:
Sungkai makan buboo laksa,
Buboo laksa dalam cangkiee..
Ampat haie sudah puasa,
Puasa alom ada ku mangkiee..
Bilalang Imba:
bila bagas mbubuu laksa
baik d antati jua paadian
Mun kakal olah puasa
Jaan banaa d tinggal akan.
Fazidah Ahmad:
Isi kendul secangkie panuh,
tinggal makan daie cangkie,
puasa ramadhan sabulan panuh,
mun llaki ndada sabab kan mangkie.
Kadayan Banaa :
Tanaik-naik anak balingkasa,
Anak lauk dalam paahu..
Yang sudah2 baik jua asa,
Isuk2 alom jua diee tahu..
Fazidah Ahmad:
Paut lapaa haik haik,
sakit sampai kaluaa paluh,
jaga sj kasihatan baik baik,
haap puasa sebulan ni panuh.
Kadayan Banaa :
Nini haji nahan pukat,
Babahata buah manungan..
Puasa amalan jadi baakat,
Mudahan sampai kapahujungan..
Fazidah Ahmad:
Nene laki nahan pukat,
sambil mencahaie lokan,
mudah2an puasa kita dapat baakat,
KB doa mu ku amin kan.
Kadayan Banaa:
Tuhoo aing uwas balampaa,
Ada jua paaca kain kasa..
Lehee kaing paut pun lapaa,
Andangnya jua aie puasa..
Kadayan Banaa:
Pucuk lamba pucuk pauh,
Pucuk gatah gugoo ka paya..
Bulan puasa labih sapauh,
Nda lagi batah kita baaya..
Mohd Saiful Rizal Amlih:
Jalan ke paya paya,
Pohon duyan alom bapuih,
Nda ku tahu ulah kan baaya,
Baju aya pun alom ku luih...
Ali Hassan Pirambib:
sungai ada buaya
Baik ku mulih
Banyak baju aya
Payah ku memilih
Si Noo:
pucuk lamba pucuk pauh,
pucuk gatah gugoo ka bukit;
biaa pun aya inda lgi jauh,
aya tahun ani lain tia dikit.
Kadayan Banaa:
Mulih kg tuun bakayuh,
Mbawa pulang daging payau..
Di kampung mikin iyuh,
Di bandaaa pulang mikin siau..
Fazidah Ahmad:
Owang tuha dlagau liau,
luih saikong payau,
gayanya banaa siau,
hati ku pun tuot siau.
Ashleyn Bumiputraputri Rockers:
Katupat aya sudah dibali
Tingal lagi randang kn di buati
Jgn padian di siaukan hati
Bagumbia tah di aidilfitri
Bilalang Imba:
Banyak isinya saikong payau
Uja basia siuk d kakaah.
Mun sayanee alum taya siauu
Mun lusa mangkali jua pakah.
Bilalang Imba:
Mbali kasut payah kan milih
Mbali sapasang di pakai aya
Jaan tah nangis nda dapat mulih
Bawaee saja badindang lagu aya
Ashleyn Bumiputraputri Rockers:
Ke kadai mbali dian
Sambil membali di toleh2
Sabaa kan sja hati padian
Aya hadapan insha Allah dpt mulih
Kadayan Banaa:
Byk dangan bajual di tamu,
Hajat kan mbali lada..
Hantap siaunya jamu,
Saowang pun nda lagi ada..
Janie Kasdi:
Nada bagaji mun nda karaja
Camana tah kan jadi kaya
Kamu ani luan siau siau saja
Mudah2an nda kaliatan anak bulan nda jadi hari raya...
Dandan Madi:
balusii kakii naulih ka kanan...
taumpak batu binjul kepala....
jaan luan hantap dipikiikan nda tamulih tu paadian...
bapasan saja kiim salam ahh bisia...
Kadayan Banaa:
Buah nangka hantap babauu,
Bahautah ya maasaaie babuah..
Samuha taya kan dibali bahauu,
Macam tah jilama bahauu maluah..
Bilalang Imba:
Andang nyatu mun sdh biasa
Mbali kuusi ba ibuu ibuu
Andang nyatu sikap mandusia.
Inda asi mun nda ada yg bahauu
Ali Hassan Pirambib:
D atas jalan
D bawah bukan
Puasa sebulan
Aya sakan
Kadayan Banaa:
Mun kita kan ka paya,
Jaan kalupahan mbawa tikaa..
Mun sudah aie kan ayaa,
Abis banaa kan di tukaa..
Bilalang Imba:
Matuka andah bangis ka upa
Hantap banaa tapakai nini
Manukaa naindah inda kanapa
Jaan saja manukaa bini.
Ali Hassan Pirambib:
Buka puasa mkn megi..
Megi d mkn megi kari..
Utk diri inda jua lagi..
Utk anak besuka hati..
Kadayan Banaa:
Nini bini nganyam tikaa,
Lawa upanya bagaya-gaya..
Awu mun bini pun ditukaa,
Hantap jua banaa2 baaya..
Kadayan Banaa:
Ucing ani ka mana taya,
Saikong pun nda ada panya..
Alang-alang ba-aie aaya,
Anak jan indong sama juanya..
Ali Hassan Pirambib:
20 tahun dahulu kita..
Apa pn nahada betungkat dagu..
Ddk termenung galir aing mata..
Melihat anak nyadangi kasut bahaau..
Kadayan Banaa:
Jauh aahnya pulau bali,
Dtg jua mun balaai..
Paanak mbali-mbali,
Diie tukang mbaai...
Ali Hassan Pirambib:
Uja bini nyatu
uja diri nyani..
Nada yg bahaau..
Kakal jua yg biani..
Bilalang Imba:
Jaan mahintuu sipun malantung
Mbayee supan ta ambak ambak
Andang nyatu mun jadi indung
Kawajipan diee mbalanjaee anak2.
Kadayan Banaa:
Banyak dangan mbali lampung,
Aku saowang mbali baladaa..
Banyak dangan mulih kampung,
Aku saowang kakal di bandaa..
Kedayan Malaganggai:
Luan taangnya lampung
Tasuluh mata buhaya
Bia dgn mulih kampung
Di bandaa pun siuk jua baaya
Kadayan Banaa:
Dinding kapal dilantak paku,
Samuha taya abis binasa..
Mun nuot tagooan ku,
Saiyani pangabisan puasa..
Bilalang Imba:
Uja nini inda kawasa
Bila makan nda ba bismillah
Mun sayani pangabisan puasa
Esok aya taya tu pakah.
Kadayan Banaa:
Maie kita babaya,
Sama2 tuun ka paya..
Diie yang baaya,
Tauke yang kaya..
Wassalam.
#Kadayan Banaa - Maantang-antang pantun#
